នៅថ្ងៃទី៥ ខែមករា ឆ្នាំ២០២៦ គម្រោងលើកកម្ពស់ការយល់ដឹងសុខភាពផ្លូវចិត្តនៅតាមគ្រឹះស្ថានឧត្តមសិក្សានៃប្រទេសក្នុងតំបន់អាស៊ីអាគ្នេយ៍ ហៅកាត់ថា MENTALHIGH មានសេចក្តីសោមនស្សរីករាយបានរៀបចំនូវកម្មវិធីសិក្ខាសាលាព្រឹត្តិការណ៍សុខភាពផ្លូវចិត្តស្តីពី “ការយល់ដឹងពីអារម្មណ៍តាមរយៈតន្រ្តី” ក្រោមអធិបតីភាព លោកស្រី ប៊ុន សុផានី នាយិការងនៃវិទ្យាស្ថានជាតិអប់រំ និងមានការចូលរួមពីលោក លោកស្រីព្រឹទ្ធបុរស មហាវិទ្យាល័យគរុកោសល្យ លោក លោកស្រី អនុប្រធានអង្គភាពកិច្ចការទូទៅ លោក លោកស្រីប្រធាន អនុប្រធានដេប៉ាតឺម៉ង់ ការិយាល័យ បណ្ណាល័យ និងលោក លោកស្រីជាគ្រូឧទ្ទេសនៃវិទ្យាស្ថានជាតិអប់រំ។
ជាកិច្ចចាប់ផ្តើមកម្មវិធីលោកស្រី នូ ចន្នី អ្នកសម្របសម្រួលគម្រោង MENTALHIGH នៃវិទ្យាស្ថានជាតិអប់រំ បានណែនាំពីគម្រោង MENTALHIGH និងគោលបំណងនៃសិក្ខាសាលា។
កិច្ចបន្ទាប់មកទៀត លោកស្រី ប៊ុន សុផានី នាយិការងនៃវិទ្យាស្ថានជាតិអប់រំបានមានមតិសំណេះសំណាល និងមានចំណាប់អារម្មណ៍ចំពោះគ្រោង MENTALHIGH និងបង្ហាញពីសារៈសំខាន់ និងអត្ថប្រយោជន៍នៃការចូលរួមសិក្ខាសាលាពីសុខភាពផ្លូវចិត្តដែលជាផ្នែកមួយជួយដល់ការគ្រប់គ្រងអារម្មណ៍បានល្អប្រសើរ។
នៅក្នុងសិក្ខាសាលានេះ ចែករំលែកដោយ លោកស្រី ហុង ណៃស៊ីម លោកស្រី សាន សោយរុក្ខា និងលោកស្រី វ៉ា ចំណាន ដោយបានលើកឡើងនូវខ្លឹមសារសំខាន់ៗដូចជា ការកំណត់និយមន័យ អារម្មណ៍ សារៈសំខាន់នៃការរក្សាផ្លូវចិត្ត ការគ្រប់គ្រងផ្លូវចិត្តតាមរយៈការស្ដាប់តន្រ្តី ការរាំកំសាន្ត ការគ្រប់គ្រងការដកដង្ហើម និងការគូសរូបភាពផ្សេងៗ ដែលបានផ្ដល់ឱកាសដល់អ្នកចូលរួមបានអនុវត្តផ្ទាល់។
សិក្ខាកាមទាំងអស់ បានចូលរួមយ៉ាងសកម្មក្នុងអនុវត្ត ការចែករំលែក ក៏ដូចជាឈ្វេងយល់ពីប្រធានបទដែលបានលើកឡើងជាពិសេសទាក់ទងនិងការយល់ដឹងពីអារម្មណ៍តាមរយៈតន្រ្តី និងបានធ្វើការឆ្លុះបញ្ចាំងពីអ្វីបានទទួលបានពីការចូលរួមក្នុងសិក្ខាសាលានេះ។ ក្នុងនោះផងដែរសិក្ខាកាមបានថ្លែងអំណរគុណដល់កម្មវិធីសិក្ខាសាលាដែលបានចែករំលែកចំណេះដឹងដ៏មានសារៈសំខាន់ និងប្រកបដោយសារៈប្រយោជន៍នេះ។ ជាចុងក្រោយ លោកស្រី ប៊ុន សុផានី បានថ្លែងអំណរគុណដល់សិក្ខាកាម និងលើកទឹកចិត្តឱ្យបន្តចូលរួមក្នុងកម្មវិធីរបស់គម្រោងដើម្បីយល់ដឹងពីសុខភាពផ្លូវចិត្តបន្ថែមទៀត។ នេះសរបញ្ជាក់ពីការចូលរួម និងគាំទ្រយ៉ាងពេញទំហឹងរបស់ថ្នាក់ដឹកនាំដល់សកម្មភាពគម្រោងគាំទ្រសុខភាពផ្លូវចិត្តចំពោះមន្ត្រីក្រោមបង្គាប់ក្នុងវិទ្យាស្ថានជាតិអប់រំទាំងមូល។
