ថ្ងៃសុក្រ ៥កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៦ ខែតុលា ឆ្នាំ២០២៦ គណៈគ្រប់គ្រង និងគ្រូឧទ្ទេសនៃវិទ្យាស្ថានជាតិអប់រំ ដឹកនាំដោយឯកឧត្តមបណ្ឌិត សៀង សុវណ្ណា នាយកវិទ្យាស្ថានជាតិអប់រំ បានអញ្ជើញធ្វើទស្សនៈកិច្ចសិក្សានៅវិទ្យាល័យហ៊ុនសែនវាលរេញ ខេត្តព្រះសីហនុ ក្នុងគោលបំណង៖ ១. ឈ្វេងយល់អំពីឧត្តមានុវត្តន៍របស់វិទ្យាល័យហ៊ុនសែនវាលរេញ ២. សិក្សាពីស្ថានភាពនៃការអប់រំជាក់ស្ដែងនៅមូលដ្ឋាន។ ដំណើរទស្សនៈកិច្ចសិក្សានេះទទួលបានលទ្ធផលដូចតទៅ៖ ១- បានឈ្វេងយល់ពីដំណើរការនៃការអភិវឌ្ឍវិទ្យាល័យ តាមរយៈការធ្វើបទបង្ហាញរបស់គណៈគ្រប់គ្រងវិទ្យាល័យហ៊ុនសែនវាលរេញ និងការទស្សនាសមិទ្ធិផលនានា រួមមានហេដ្ឋារចនាសម្ព័ន្ធសាលារៀន ស្នាដៃនៃការសិក្សារបស់សិស្ស ដែលទាំងអស់នេះបានកើតចេញពីភាពជាអ្នកដឹកនាំរបស់លោក ងៀម ស៊ីដារ៉ា នាយកវិទ្យាល័យហ៊ុនសែនវាលរេញ ព្រមទាំងបុគ្គលិក គ្រូបង្រៀន សហគមន៍ និងសិស្សានុសិស្សទាំងអស់។ ២- បានឈ្វេងយល់ពីបញ្ហាប្រឈម និងដំណោះស្រាយល្អៗរបស់វិទ្យាល័យនាពេលកន្លងមក ដែលជាមេរៀនមួយសម្រាប់វិទ្យាស្ថានជាតិអប់រំ អាចចែករំលែកដល់វិទ្យាល័យផ្សេងទៀតនាពេលអនាគត។
